Түштүк Африка Республикасы курамасы «В» тайпасында төрт упай топтоп, сенсациялуу түрдө экинчи орунду ээледи. Түштүк африкалыктар биринчи турда Дүйнө чемпионатынын дагы бир кожоюну Мексикага утулуп (0:2), Чехия менен тең чыгып (1:1) жана Түштүк Кореяны жеңип алышты (1:0).

Канадалыктар да «А» тайпасында төрт упай менен экинчи орунду камсыздашты. Бул курама Босния жана Герцеговина менен тең чыгып (1:1), Катарды ири эсепте талкалап (6:0) жана Швейцарияга жол бошотуп берген (1:2).

Түштүк Африка Республикасы — Канада беттеши 28инен 29-июнга караган түнү Лос-Анжелесте өтөт. Канадалыктар бул мундиалда биринчи жолу өз өлкөсүнөн тышкары жерде ойношот. Тайпалык баскычта алар бир оюнду Торонтодо, ал эми эки оюнду Ванкуверде өткөрүшкөн.

Түштүк Африка Республикасы курамасы бул дүйнө чемпионатында АКШдагы экинчи оюнун өткөрөт. Алгачкы жолу Атлантада Чехия менен ойногон. Ал эми Мексика менен Мехикодо, Түштүк Корея менен Гуадалупеде кездешкен.

Дүйнө чемпионатынын тайпалык баскычы 11-июндан 27-июнга чейин созулат. Анын жыйынтыгы менен ар бир тайпадан эң мыкты экиден команда жана үчүнчү орунду ээлеген эң мыкты сегиз команда плей-оффко жолдомо алат.

Дүйнө чемпионаты-2026 АКШ, Мексика жана Канаданын талааларында өтүп жатат. Турнир 11-июнда башталып, 19-июлга чейин уланат. Учурдагы чемпиондук титулдун ээси — Аргентина курамасы.