Bu il "PASHA Hackathon"a ümumilikdə 500-ə yaxın komanda müraciət edib. Seçim mərhələsinin nəticələrinə əsasən, 56 komanda hakatonda iştirak edərək öz gücünü sınayıb.

Yarış iştirakçıları 3 gün ərzində Bravo Supermarket tərəfindən təqdim olunan biznes tapşırığı üzərində çalışaraq şirkət üçün innovativ həllər və yeni ideyalar hazırlayıblar. Hakaton boyunca Bravo Supermarket nümayəndələri və müxtəlif sektorlardan olan 40-a yaxın mentor iştirakçılara dəstək göstərib, onların layihələrinin inkişafına töhfə verib.

Keçən il olduğu kimi, bu dəfə də hakatonun sonunda ilk üç yeri tutan komandalar müvafiq olaraq mükafatlandırılıblar: 1-ci yer üçün 7000 AZN, 2-ci yer üçün 5000 AZN, 3-cü yer üçün isə 3000 AZN pul mükafatı təqdim olunub. Bununla yanaşı, qalib komandalar PAŞA Holding-in daxili akselerasiya və inkubasiya proqramlarına qoşulmaq imkanı da əldə ediblər.

Qeyd edək ki, "PASHA Hackathon" innovativ məhsul və həllərin yaradılmasına yönəlmiş 48 saatlıq texnologiya yarışmasıdır. PAŞA Holding tərəfindən artıq 6-cı ildir təşkil olunan layihənin əsas məqsədi gənclər arasında innovativ düşüncə tərzini və həll yönümlü yanaşmanı təşviq etmək, eləcə də ölkədə innovasiya mədəniyyətinin inkişafına dəstək verməkdir.