Президент Садыр Жапаров

«Электрондук акчаны мурастоо маселелери боюнча Кыргыз Республикасынын айрым мыйзам актыларына өзгөртүүлөрдү киргизүү жөнүндө»

Мыйзамга кол койду.

Түзөтүүлөргө ылайык, ээси каза болгондон кийин электрондук акчаны кайтарып берүүнү талап кылуу укугу мурастын курамына киргизилет. Бул жерде кеп биринчи кезекте электрондук капчыктарда жана башка электрондук алып жүрүүчүлөрдө сакталган каражаттар жөнүндө болуп жатат.

Нотариустун суроо-талабын, ыйгарым укуктуу мамлекеттик органдын катын же мураскорлордун талабын алгандан кийин электрондук акчанын ээси эмитенти каза болгон адамдын каражаттары менен чыгаша операцияларын токтотууга тийиш.

Мураскорлорго же алардын мыйзамдуу өкүлдөрүнө электрондук акчанын бар экендиги жана анын өлчөмү, ошондой эле электрондук капчыктын же башка алып жүрүүчүнүн реквизиттери жөнүндө маалымат берилет. Бул үчүн мураска болгон укукту ырастаган документтерди көрсөтүү зарыл.

Мурас таризделгенден кийин эмитент электрондук акчаны төлөп берүүгө, тагыраагы, тиешелүү сумманы накталай берүүгө же каражатты мураскорлорго которууга милдеттүү.

Өзгөртүүлөр ошондой эле банктарга нотариустарга жана мураскорлорго каза болгон адамдын аманаттары жөнүндө гана эмес, анын электрондук акчалары, сейфтик ячейкалары, металл эсептери жана жарандык укуктардын башка объекттери тууралуу да маалыматтарды берүүгө мүмкүндүк берет.

Мыйзамга ылайык, электрондук акча — бул электрондук түрдө, анын ичинде алдын ала төлөнгөн картада же электрондук капчыкта сакталган жана товарлар менен кызмат көрсөтүүлөр үчүн төлөөгө колдонулган акчалай нарк. Аларды банктык эсептеги каражаттардан жана санариптик сомдон айырмалоо керек.

Мыйзам бул тармактагы боштукту четтетет, анткени буга чейин мыйзамдарда электрондук акчаны мурастоонун атайын тартиби белгиленген эмес болчу. Документ он күндөн кийин күчүнө кирет.

Белгилей кетсек, 2026-жылдын башына карата өлкөдө 6,6 миллиондон ашык электрондук капчык катталган.