Day.Az xəbər verir ki, mütəxəssislərin məlumatına görə, bu dövrdə güclü maqnit qasırğası proqnozlaşdırılmasa da, bir neçə gün ərzində orta səviyyəli geomaqnit dəyişikliklər müşahidə oluna bilər.

Bildirilir ki, 26 və 27 iyun tarixlərində aktivlik bir qədər yüksələcək və Kp indeksinin 3,7-yə qədər çatması ehtimal olunur. Bu göstərici orta səviyyəli geomaqnit pozulma sayılır və əsasən səhər və axşam saatlarında daha çox hiss edilə bilər.

28 iyundan etibarən aktivliyin zəifləyəcəyi, Kp indeksinin təxminən 3 səviyyəsinə enəcəyi proqnozlaşdırılır. 29-30 iyun tarixlərində isə Günəş aktivliyinin azalması ilə geomaqnit sahəsinin daha sabit qalacağı bildirilir.

Mütəxəssislər qeyd edirlər ki, bu dəyişikliklər təhlükəli hesab olunmur və əksər insanlar bunu hiss etməyə bilər. Lakin meteohəssas şəxslərdə, yaşlılarda, hamilə qadınlarda və ürək-damar problemi olan insanlarda bəzi narahatlıqlar yarana bilər.

Mümkün əlamətlər arasında baş ağrısı, yorğunluq, yuxu pozğunluğu, təzyiqdə dəyişiklik, ürəkdöyünmədə artım, əsəbilik və diqqət dağınıqlığı göstərilir.

Həkimlər belə günlərdə kofein və energetik içkilərin azaldılmasını, bol su içilməsini, yüngül qidalanmanı və kifayət qədər yuxu alınmasını tövsiyə edirlər. Açıq havada gəzinti də faydalı sayılır, lakin günün ən isti saatlarında birbaşa günəş altında uzun müddət qalmaq məsləhət görülmür.