Дар моҳи январи соли равон бонк аз нав сабт ва таҷдиди шахсияти кортҳои худро оғоз кард, ки ҳадафи он «таъмини амнияти молиявии мизоҷон ва шаффофияти транзаксияҳо, инчунин коҳиш додани хатари қаллобӣ» мебошад.

Тавре дар «Амонатбонк» ба «Азия-Плюс» хабар доданд, тибқи маълумоти 16 апрел тақрибан 60% кортҳои бонкӣ аз нав сабт шудаанд, бинобар ин муҳлати сабт то охири семоҳаи дуюми соли равон дароз карда мешавад.

Чӣ тавр кортро аз нав сабт кардан мумкин аст?

Тибқи маълумоти қаблан аз ҷониби «Амонатбонк» пешниҳодшуда, ба ҳар як мизоҷ барои сабт паёми SMS фиристода мешавад ва агар ӯ дар давоми 30 рӯз пас аз фиристодани паём ба бонк муроҷиат накунад, корти бонкӣ муваққатан баста мешавад. Фаъолсозии корти бонкӣ пас аз муроҷиат ба бонк ва сабти такрорӣ анҷом дода мешавад.

Аз нав сабт тавассути барномаи махсуси мобилӣ дар 75 филиал ва 547 маркази хидматрасонии «Амонатбонк» сурат мегирад.

Барои сабт бояд бо шиноснома ва корт ба ягон шӯъбаи бонк омад. Дар барнома маълумоти корти мизоҷ ва рақами телефони мобилӣ ворид карда мешавад, инчунин акси корт, шиноснома ва селфии мизоҷ бо шиноснома гирифта мешавад.

«Новобаста аз он ки мизоҷон дар кадом ноҳия қарор доранд ва дар кадом шӯъба корт гирифтаанд, онҳо метавонанд ба ягон шӯъба ё маркази хидматрасонии бонкӣ муроҷиат кунанд ва онро аз нав сабт кунанд», — гуфтанд дар бонк.

Дар «Амонатбонк» гуфтанд, ки барои сабти шахсони маъюб ва онҳое, ки шахсан ба бонк омада наметавонанд, кормандон «ба ҷои зисти мизоҷ дар вақти барояш мувофиқ омада, аз нав сабтро анҷом медиҳанд».

Оё бо ваколатнома сабт кардан мумкин аст?

Дар посух ба саволи «Азия-Плюс» дар бораи имконияти аз нав сабти корт бо ваколатнома, бонк ҷавоб дод, ки «ин имконпазир аст».

«Дар асоси ваколатнома ба мизоҷоне, ки дар хориҷа ҳастанд, то бозгашт ба кишвар низ имконияти аз нав сабт дода мешавад ва пас аз бозгашт онҳо метавонанд равандро ба анҷом расонанд», — гуфтанд дар «Амонатбонк».

Аммо мо посухи мушаххас ба саволи имконияти сабти онлайнӣ нагирифтем. Сокинон таъкид мекунанд, ки чунин имкон нест. Санҷиши мо низ тасдиқ кард, ки аз нав сабти корт онлайн ғайриимкон аст.

Дар бонк қайд карданд, ки яке аз ҳадафҳои асосии ин ташаббус таъмини он аст, ки «кортҳои бонкӣ танҳо аз ҷониби соҳибони онҳо истифода шаванд ва амалиёт мувофиқи талаботи қонунгузории амалкунанда гузаронида шавад» ва барои ин ҳузури шахсии мизоҷ дар раванди аз нав сабт муҳим аст.

p>Қобили зикр аст, ки дар Тоҷикистон музди меҳнати аксари кормандони бахши буҷетӣ, нафақа ва стипендияҳо ба кортҳои «Амонатбонк» гузаронида мешаванд. Тибқи маълумоти кормандони бонк, мизоҷони он беш аз 2 миллион корти бонкиро истифода мебаранд.