Вазни 66 кг, ки ду намояндаи Тоҷикистон ба муборизаи ҳалкунанда расиданд, рӯйдоди асосии рӯз гардид. Эмомалӣ Нуралӣ ва Обид Ҷебов финали таърихиро ташкил дода, ба кишвар дар як вақт тилло ва нуқраро кафолат доданд.

Нуралӣ баромади худро аз чорякфинал оғоз карда, варзишгари муғулистонӣро боварибахш шикаст дод ва сипас дар нимфинал намояндаи Чинро мағлуб кард. Ҷебов роҳи дарозтарро тай карда, рақибон аз КХДР, Муғулистон ва Кореяи Ҷанубиро паси сар гузошт.

Дар финал ҳама чиз як баҳо – юко ҳал кард. Эмомалӣ Нуралӣ дақиқтар ва оромтар буда, медали тиллоро ба даст овард ва Обид Ҷебов соҳиби медали нуқра гардид.

Обид Ҷебов ва Эмомалӣ Нуралӣ дар поягоҳ. Акс: IJF

Ин натиҷа таърихӣ гардид: бори аввал дар таърихи чемпионатҳои Осиё ду дзюдоистони тоҷик дар финали як вазн вохӯрданд. Бори охир Тоҷикистон дар соли 2017, вақте Комроншоҳи Устопириён фарқ кард, тиллои чемпионати Осиёро ба даст оварда буд.

Медали сеюмро ба хазинаи даста Мадина Қурбонзода дар вазни 52 кг овард. Вай даврҳои ибтидоиро гузашта, рақибон аз Ҳонконг ва Ҳиндустонро шикаст дод, аммо дар нимфинал ба намояндаи Муғулистон бохт. Бо вуҷуди ин, дар мубориза барои биринҷӣ Қурбонзода ҷамъ омада, варзишгари Ҳонконгро мағлуб карда, ҷойи сеюмро ба даст овард.

Мадина Қурбонзода (дар либоси кабуд). Акс: IJF

Дар вазни 60 кг Меҳрзод Суфиев мусобиқаро бо пирӯзӣ оғоз кард, аммо сипас дар чорякфинал ба дзюдоистони қазоқистонӣ бохт. Дар даври тасаллӣ ӯ имкони биринҷиро нигоҳ дошт, вале ба намояндаи Ӯзбекистон шикаст хӯрда, баромадашро анҷом дод.

Чемпионати Осиё дар системаи IJF мақоми баланд дошта, ба рейтинги ҷаҳонии варзишгарон бевосита таъсир мерасонад. Ғолиби мусобиқа тақрибан 700 хол, соҳиби медали нуқра 490 ва соҳибони медали биринҷӣ 350 хол мегиранд.

Эмомалӣ Нуралӣ (дар либоси сафед). Акс: IJF
Обид Ҷебов (дар либоси сафед). Акс: IJF

Ба ҳайати дастаи мунтахаби Тоҷикистон дар байни мардон дохил шуданд: Меҳрзод Суфиев (60 кг), Эмомалӣ Нуралӣ, Обид Ҷебов (66 кг), Муҳиддин Асадуллоев (73 кг), Сомон Маҳмадбеков, Беҳрӯзи Хоҷазода (81 кг), Муҳаммадҷон Абдуҷалилзода, Шодмон Ризоев (90 кг), Ҷаҳонгир Маҷидов (100 кг).

Дар мусобиқаи занона Тоҷикистонро чор варзишгар намояндагӣ мекунанд: Аҳлия Муъминова (48 кг), Мадина Қурбонзода (52 кг), Александра Кан (57 кг), Виктория Киселёва (+78 кг).